2Cor 1 | MPS | STEP | Ena Pol dao, ena te Krais Jisasgo sę ebo tagala palai bidi dao. God aga homugo digi tama Godigo ena te aga sę ebo bidi muai. Ena dali, te dago ama Timoti da sigo pas te dage Godigo po odoyu te Korin moni hanude bidibo we bidi dagebolo e pas asęna tolobao, te moni Grik tǫ pedai tigidali badu bidalubo te Godigo we bidi tigidalibolo eno e pas asęna tolobao.

2 Corinthians 1

Polgo po hanilama weyu, te Godigo tagala palali bidi aposel dabeba sę mani po wali

(Dąį 1-7)

1 Ena Pol dao, ena te Krais Jisasgo sę ebo tagala palai bidi dao. God aga homugo digi tama Godigo ena te aga sę ebo bidi muai. Ena dali, te dago ama Timoti da sigo pas te dage Godigo po odoyu te Korin moni hanude bidibo we bidi dagebolo e pas asęna tolobao, te moni Grik tǫ pedai tigidali badu bidalubo te Godigo we bidi tigidalibolo eno e pas asęna tolobao. 2 Eno homugo te dago Aya God dali, te Genuai Bidi Jisas Krais daligo, te olo mu da tau siyu mabo wiegi yai kolesagago te dagego homu nagame ilama bidiąo.

Polgo te Godigo aga tau sobaso gedu haluasa po weyu usu da wai

3 Dago agabolo puba hwi po weyu, tama God nogi ugwaba sao, aga te God tama dago Genuai Bidi Jisas Kraisgo Aya dao. Aga te dago Aya, tama aga te hobede eyu tau sabo page bidi dao. Aga te tigidali sęgę elalubo bidigo homu nagame ilibo God dao. 4 Te tigidali dene mabo sęgę daba pedalobo agai te dago homu nagame ilibo dao. Magi basowe? Agai da homu nagame ilibo kolesagago naga dago te haniani sęgę elalubo bidi dabe augwali homu nagame ilimainogo eyu, te Godigo da homu nagame bugagia ilibo dao. 5 Magi baso meni, te Kraisgo tolali genuai dene, te dago me te tiwai naga tolobao. Tama tiali goli, te sogo me te Kraisgo genuai homu nagamego da pągąnai dao, te nagame ilibo kolesaga te dene tiwai si pedalobo dao. 6 Te da sęgę tolobaso da, te dagego homu nagame iliyu tiaibao, tama Godigo dage ma somainogo ebao. Tama Godigo dago homu nagame ilibaso da, te dagego homu me nagame ilimainogo ebao. Te dage bomo elama dolaluyu, tama dago tolobo dene tiwai tolobaso da, teda Godigo dage homu nagame ilaibao. 7 Tama homu si isąyu, dago homugo koneani, te dage bomo elama dolalueibao. Dago koneai, dage da dali dene tolobao, tama tibaso te dage da dali te homu nagame ebo kolesaga me selama bidaibao.

8 Ama dedeo, te dago homugo te moni tǫ pedai Esia tede te sęgę daba pedalali te dagego koneaibao. Te genuai sęgę mugo da aiyaba elaluama, tama dago bomo aiyaba mu elaluali. Tama tiyu, tama dago homugo te da isabo homu yali dao. 9 Mu po da wali, te da homu sęgę ebo te po tų ebo bidi jasgo te da isimainao po wali tiwai elama bidali. Te sęgę dabe te tiwai magi baso pedalaliwe? Te dena bomogo usu yabo homu idali weyu te sęgę daba pedalali. Dago te Godigo bomoba homu tialumainogo yai, te agai te isai bidi dabe augwali hodolobo bidi dao. 10 Te Esia tǫde dwai nai mugo da ela muainogo yali, tiali goli Godigo tede da ma dobola sai. Tama megi me te agai da ma sidu gebo dao. Tama tibaso, dago dena homu te tobage sę ebo God agaba dąų weyu, tama dago homu e tiwai ebo dao, sesemane sogo te dwai naigo da dolainogo ebadi, te agai da ma selama, tama da bugagia bidaibao. 11 Tama dagego tede Godibolo hanalu wabo po wabogo da tau sao. Tama tiyu te Godigo te we bidi hauwago aga hanalu wabo po tama odama, tama agai da tau saibao. Tama we bidi hauwago te agai da tau sali sęba homu koneama, tama Godibolo usu da po agai te yali dwagi yai sęde waibao.

Pol aga sę yabo homu hasegelama, te Korin dabe tibo po ola mayabo homu me ebeo

12 Dago wiegi yai homu pemene ebo sę e kolesaga delide ebo dao: dago homugo hanilama po pusuyu da, te magi dwai sę isąbo te wiegi yai kolesaga me tama te Godigo da mabo te meda isąwai homu kolesagade bilibo po pusubao. Te e tǫde bidigo koneani kolesaga te dago wali pabeo. Menio. Te Godigo olo mayu tau sabo wiegi yai kolesagago naga da tau selama, tama da te tiwai kolesagade bilibao. Tama da te kolesagade te tigidali bidi tomode bilibo dao. Tama dageba dago te kolesaga me mu ela pidu geai dao. 13 Dago gasa po me dageba asęna tolobeo. Menio. Te po dagego nedama tama page koneabo po naga asębao. Tama megi dagego da gisiga konesiąyu, mesela naga koneai goli, dena homugo te dagego nosali da kuna koneaibao homu yai. Tama tiyu, te Genuai Bidi ma asobo sogo te dago dagede wiegi yai homu pemene ebogia, te dagego da dali wiegi yai homu pemene yagameo, te tiwai si naga yaibao.

15 Tama dagego enade te dwagi yai abagi homu ebo kolesaga tede eno homu si isąbaso, tama polobadu eno po weyu, te eno homugo hasia dage bidibo madibolo pelama, tama duga wiegi yai homu si sogo yagameo po wai. 16 Eno homugo hasia ena dage bidibo madibolo pabo homu yali, tama eno dage tagalama, tama ena te Masedonia genuai tǫ pedai teba paibao wali, tama eno te Masedonia tǫ tagalama, te ena dage bidiboba ma asaibao wai. Tama eno homugo dagego ena te Judia tǫba tagala palomainogo yai dao. 17 Tiali goli, te dageba pabo tų paliali, te ena dageba asobe. Magi basowe? Eno e tama tiabo po wai, tiali goli eno po subigila hasegelali homu elama tama eno po olo wali dawe? Ma, eno te yaibao wali sę isąbaso da, te eno e tǫde bidigo olo po wabo tiwai elama, tama ena te homu mu isąwai bidi dawe? Mu menio. 18 God da, te homu mu ebo bidi dao, tama aga da dali homu kęą pai bidi dao, tama agai dabolo te du walisiąbo po pusubo meni. Tama tialigo da, te dago dagebolo pusali po me te page si elaluali po meni. Polobadu eno dagebolo te ena dageba asaibao po wai. Tama homu mu naga eyu eno te po wai. Tiali goli eno gasa sę elalubaso, ena dageba ma asobo usube. 19 Ena me Sailas me Timoti, dago dage tomode pusali po, te Godigo Ogwa Jisas Krais agade te po pusali. Tama Krais aga subigila hasegelebo menio, aga da te aga homu polo subigila hasegelebo bidi meni. Agai aga dąų walali po togogobeo, aga yaibao wali sę te aga mu yaibao. 20 Te Godigo dąų wali po hauwa elalubao, tama Kraisde naga te dąų walali po tigidali mu usu nagasai dao. Tama tibaso, dago Godigo po odama, tama Kraisgo nogide naga dago te po weyu, “Awe, mu dao,” te pode olama, tama dago Godigo nogi ugwaba sabo dao. 21 Tama Godigo digi da dali dage dali bomo ilama, tama da Krais dali homugo kęą pai we bidi bidibao. Tama agai digi da dią selama tama sęba me muai dao. 22 Agai aga dąį iliyu daba sa muani, tama dago homuba Tedali Mobo Bidi mawai. Godigo te da dali gasa wiegi yai sę nosali yabo homu eyu, tama te Mobo Bidi hasia dabolo mani, tama dago te koneao wai: mu tama agai te tigidali wiegi yai sę da dali mu yaibao.

Pol te augwali bidibo madi te Korinba polo me pabeo wai

23 Te eno te polobadu asęna tolali pasgo te dageba asobode tibo po wai yaibaso da, teda Godigo eno te tibo po wali te hania haninagameo. Tiali goli, menio. Eno mu po naga obao. Te eno sęgę dageba mabo te eno hagela homu yali, tama tiyu te ena dage bidibo madi polo me te Korin buluba ma asobe dao. 24 Te dagego Kraisde konealubo po dąų olama, agaba homu tialubo te dago tonalubo tiwai me egobeo. Menio. Te agaba tialubo kolesagade dage bomo elama dolalubao. Tama dago sę dage dali eyu te dagego wiegi yai homu pemene ebo te pedalomainogo tebo dao.